PRIJANT Bastian hag Herri Kizellerien mein a oa anezho, padal en em ginnig a raent evel « imajerien », evel-se e veze graet eus ar gizellerien er mare-se ».
Eus 1527 betek 1557 e oa bet dalc’het ur stal-labour ganto e Landerne. An darn vrasañ eus o labour zo bet graet gant ar C’hersanton (mein Kersanton).

Renablet eo bet frouezh puilh o labour en un hanter-kant bennak a gumunioù e Bro-Leon, Bro-Dreger ha Bro-Gerne. E-touez an oberennoù pennañ bet savet ganto en o fezh pe evit un darn anezho, e c’haller lakaat war wel :

  • Kalvarioù bras Plougonven ha Pleiben
  • Porchedoù Penn-ar-C’hrann, Landivizio, Gwipavaz ha Lambaol-Gwimilio, an Treoù-Leon, Tremaouezan, Plouziri …
  • Un niver bras a zelwennoù a c’hall bezañ lakaet war gont ar stal-labour ivez.