Porched Lambaol-Gwimilio
| Anvioù all | Michel, Mickael, Mikêl, Priñs an aeled |
| lec’h ha mare | |
| Renabl | En deiziadur roman |
| Arouezioù | Eskell (a ziforc’h anezhañ diouzh sant Jorj), harnez, goaf pe gleze, giton, krog-pouez |
| Gouel | Lidet e vez d’an 29 a viz Gwengolo ha d’an 8 a viz Mae ivez, deiz-ha-bloaz gweledigezh Menez Gargano en Italia er Vvet kantved. |
| Buhez, mojennoù, Buhezskridoù sent Breizh |
| Sant Mikael zo unan eus an tri arc’hael gant Rafael ha Gabriel. Kemer a reas penn arme an Neñv da stourm ouzh emsavadeg an aeled. "E anv a dalv kement ha "piv a zo evel Doue ?" En em ledet da gentañ er Sav-heol gresianek, an enor rentet da sant Mikael a dremen d’ar C’huzh-heol war-dro ar 5vetkantved, goude gweledigezh brudet Menez Gargano, ur beg-douar eus mor Adriatik, d’an 8 a viz Mae 492, hag a vo skignet er Grennamzer dre "Mojenn alaouret" Jakez Vorajin. Sant Mikael a zoug alies div askell, n’eo ket atav, evel e chantele Gwimilio e-lec’h ma kaver ur sant Mikael hep e eskell o reiñ lamm da Satan. Dilhad sant Mikael a zo a bep seurt. Bez’ e c’heller, dre vras, o lakaat e tri rummad, hag a ya eus an dunikenn simpl afer, betek gwiskamant ar pezhioù-c’hoari, en eur dremen dre harnez-brezel marc’heg ar Grennamzer. Skoed sant Mikael a zoug a-wechoù ar peder lizherenn HVHY (Hé Vau Hé Yod), ar peder c’hensonenn a ra anv hebraeg Yahve. Ar gizellerien a ra anezhañ peurliesañ un emganner dispont e servij an Holl-C’halloudek. E-giz armoù, n’en deus nemet ar c’hleze, savet er vann, pe ar goaf, sanket en aerouant, hag a-wechoù an daou. Karget e oa ivez da ambroug eneoù ar re varv etrezek o flanedenn, ha da gemer perzh en o barnedigezh. Setu perak e lakaer a-wechoù etre e zaouarn krog-pouez ar justisour, an hini a bouez dellezoù pep hini. Diverrañ diwar "An êlez en on ilizou" Yann-Pascal Castel - Minihi Levenez. Sant Mikael zo unan eus ar sent enoret ar muiañ e santualioù Penn-ar-Bed. Gwerz an Aotrou Sant Mikael Arc’hael Paeron-Meur ar Gelted Diskan O Sant Mikael, Arc’hael benniget Ni zeu da c’houlenn ho skoazell Harpit ar feiz en hor bro garet Sikourit an Iliz santel |
| Azeulerezh |
| Aspedet e vez evit stourm a-enep an Droug (an Diaoul) pe evit salvedigezh an Anaon. Sant paeron an harzlammerien, an nerzhioù lu, ar varaerien, ar wastellerien, an iskrimerien hag ar varazherien eo. Eil patron Bro-C’hall eo, ar Werc’hez Vari an hini gentañ. E Bro-C’hall 62 gumun a zoug anv sant Mikael. |
| Lec’hioù ma vez enoret sant Mikael enno e traoñienn an Elorn |
| Gwimilio > Iliz, font-badeziant : delwennig war an daez (koad derv, Atalier ar vordeadurezh, 1675). Lambaol-Gwimilio > Iliz, stern aoter Sant Yann-Vadezour : delwenn sant Mikael o reiñ lamm d’an aerouant (XVIIvet kantved.) > Iliz, tal ar porched : Sant Mikael o reiñ lamm da Satan - Bastian Prigent XVIvet kantvet) Landivizio > Iliz, pignon su ar groazenn-iliz : Sant Mikael o reiñ lamm da Satan (Kersanton, XVIvet.) Ar Roc’h-Morvan > Iliz, jube kostez ar chantele, delwenn sant Mikael (koad lieslivet, XVIvet kantved) Lok-Eginer Plouziri > Iliz, kroazenn ar c’hreisteiz : delwenn sant Mikael (Koad lieslivet, XVIIvet kantved) Lokmelar > Iliz, chapel-vadeziñ, war-lein an daez : o reiñ lamm d’an aerouant (koad lieslivet, XVIIvet kantved) Sant-Divi > Iliz, gwerenn-livet ar chantele : daou daolennadur eus sant Mikael (XVIvet kantved) > Iliz : Banniel sant Mikael Sant-Servez > Iliz, font-badeziant : delwennig war an daez (koad koaret, XIXvet kantved) |
